చర్చ సింగరేణి : కార్మికుల హక్కులపై దాడి చేస్తే గనులు స్తంభిస్తాయి: ఏఐటీయూసీ ప్రధాన కార్యదర్శి కొరిమి రాజ్‌కుమార్ హెచ్చరిక*

చర్చ సింగరేణి కొత్తగూడెం, :

సింగరేణి సంస్థలో కార్మికుల సమస్యలు రోజురోజుకు పెరుగుతున్నా యాజమాన్యం, ప్రభుత్వాలు వాటి పరిష్కారంపై చిత్తశుద్ధితో వ్యవహరించడం లేదని ఏఐటీయూసీ ప్రధాన కార్యదర్శి కొరిమి రాజ్‌కుమార్ విమర్శించారు. కార్మికుల హక్కులను కాలరాస్తూ సంస్థ భవిష్యత్తును ప్రశ్నార్థకంగా మార్చే విధానాలను తీవ్రంగా వ్యతిరేకిస్తున్నామని ఆయన స్పష్టం చేశారు.

మంగళవారం ఉదయం సెంట్రల్ వర్క్‌షాప్‌లో నిర్వహించిన గేట్ మీటింగ్‌లో ఆయన మాట్లాడారు. దేశానికి బొగ్గు ఉత్పత్తిలో కీలక పాత్ర పోషిస్తున్న సింగరేణి సంస్థను బలోపేతం చేయాల్సిన సమయంలో రాజకీయ జోక్యాలు, కార్మిక వ్యతిరేక విధానాలు పెరుగుతున్నాయని ఆందోళన వ్యక్తం చేశారు.

*సమ్మె నోటీసుకు కారణం:*
గుర్తింపు సంఘంగా ఉన్నప్పటికీ కార్మికుల న్యాయమైన సమస్యలు పరిష్కారం కాకపోవడంతోనే ఏఐటీయూసీ 31 ప్రధాన డిమాండ్లపై సమ్మె నోటీసు ఇవ్వాల్సి వచ్చిందని రాజ్‌కుమార్ తెలిపారు. కేంద్ర ప్రభుత్వం తీసుకొచ్చిన లేబర్ కోడ్స్ కార్మికుల శ్రమ చట్టాలపై తీవ్రమైన దాడి అని, వాటి అమలు కారణంగానే 12వ వేజ్ బోర్డు కమిటీ ఏర్పాటు ఆలస్యమవుతోందని ఆరోపించారు. వేజ్ రివిజన్‌ను ఉద్దేశపూర్వకంగా వాయిదా వేస్తూ లక్షలాది మంది బొగ్గు కార్మికులను ఆర్థికంగా నష్టపరుస్తున్నారని మండిపడ్డారు.

*ప్రధాన డిమాండ్లు:*
1. సింగరేణి సంస్థకు ప్రభుత్వం చెల్లించాల్సిన సుమారు *రూ.56 వేల కోట్ల బకాయిలను* వెంటనే విడుదల చేయాలి. ఈ నిధులతో సంస్థ ఆధునికీకరణ, కొత్త ప్రాజెక్టులు, ఉద్యోగావకాశాల విస్తరణ సాధ్యమవుతుందన్నారు.
2. మణుగూరు డిసైడ్ బ్లాక్‌ను ప్రైవేట్ సంస్థలకు అప్పగించే ప్రయత్నాలను విరమించి సింగరేణికే కేటాయించాలి.
3. ఉద్యోగాల భద్రత, ఉత్పత్తి సామర్థ్యం, సంస్థ అభివృద్ధి కోసం ప్రభుత్వం స్పష్టమైన హామీ ఇవ్వాలి.
4. మెడికల్ బోర్డు పునరుద్ధరణ, మారుపేర్ల సమస్య, సొంతింటి పథకం అమలు, పెర్క్స్‌పై ఆదాయపు పన్ను భారం తొలగింపు, సహజ మరణం చెందిన ఉద్యోగుల కుటుంబాలకు మ్యాచింగ్ గ్రాంట్ పునరుద్ధరణ చేపట్టాలి.

*సెంట్రల్ వర్క్‌షాప్ సమస్యలు:*
సిబ్బంది కొరత, పనిభారం పెరుగుదల, మౌలిక సదుపాయాల లోపం, పదోన్నతుల సమస్యలు, భద్రతా అంశాలపై యాజమాన్యం నిర్లక్ష్యం వహిస్తోందని రాజ్‌కుమార్ ఆవేదన వ్యక్తం చేశారు. కేవలం ఉత్పత్తి లక్ష్యాలపై మాత్రమే దృష్టి పెట్టడం సరికాదన్నారు.

*హెచ్చరిక:*
కార్మికుల హక్కులు, సింగరేణి భవిష్యత్తు కోసం ఏఐటీయూసీ రాజీలేని పోరాటాలు కొనసాగిస్తుందని, సమస్యలు పరిష్కరించకుంటే సమ్మెతో పాటు మరింత ఉధృతమైన ఉద్యమాలకు కార్మిక లోకం సిద్ధంగా ఉందని ఆయన హెచ్చరించారు.

*హాజరైనవారు:*
కార్యక్రమంలో కార్పొరేట్ బ్రాంచ్ కార్యదర్శి ఎస్.వి.రమణమూర్తి, ఉపాధ్యక్షులు క్రిస్టఫర్, సహాయ కార్యదర్శి రాము, పిట్ కార్యదర్శి నరేష్‌, నాయకులు నాగయ్య, నరసయ్య, మల్లయ్య, రాజేశ్వరరావు, రవీందర్, కందేలింగం, ఆనందరెడ్డి, మురళి, అనిల్, రాజగోపాల్, రవి, శశికరణ్, దేవేందర్, రమేష్ తదితరులు పాల్గొన్నారు.